គួរឲ្យអនិច្ចានិងហួសចិត្ត

វាគឺរឿងពិតមិនមែនមុសា

នៅកេរ្តិ៍ដំណែលសិល្បះដូនតា

ពេលនេះប្រែជាធ្លាក់ក្នុងអវចី ។

សំបូរហូរហៀរក្រុមហ៊ុនផលិត

តែមិនបានគិតនិងឲ្យតម្លៃ

សិល្បះដូនតាធ្លាប់តែល្បាញល្បី

មិនបង្កើតថ្មីចាំតែចម្លង ។

អ្នកខ្លះតាំងខ្លួនជាស៊ុបពែរស្តារ

ច្រៀងស្រែកឡូឡាស្តាប់មិនទំនង

ខ្លះទៀតកូពីយកបទរៀមច្បង

ខ្លះអួតអ្នកផងច្រៀងបទបរទេស ។

បទចិន អង់គ្លេស កូរ៉េ ឫសៀម

ខ្មែរអាចច្រៀងតាមបានយ៉ាងពិសេស

មិនខ្វល់គេថាលូចបទបរទេស

បើតែយ៉ាងនេះខ្មែរនិងវីកវរ ។

មិនគួរចង់មានបានដោយការលូច

គេនិងប្រដូចយើងថាជាចោរ

ដូចពួកអាសៀមចោតរឿងអង្គរ

តើខ្មែរត្រេកអរទទួលយកទេ ?

ដោយ ខ្មែរមួយជាតិ

អ្វីៗក្នុងលោកកើតព្រោះហេតុ

ឃើញច្បាស់ក្រលែតគុណម៉ែឳ

កូនរស់ធំឡើងត្រូវរកផ្លូវ

សងគុណម៉ែឳទើបត្រូវច្បាប់

។

បើមិនបានសងអ្វីធំដុំ

កុំតែស្រីមុំប្រែក្រឡាប់

រត់ចេញពីផ្ទះមិនបានប្រាប់

ប្រញាប់តាមប្រុសព្រោះស្នេហា

។

ចំណែកកូនប្រុសក៏ដូចគ្នា

កុំធ្វើឫកពាមនុស្សបាតផ្សារ

ប្រគល់ខ្លួនប្រាណឲ្យស្រីសា្ររ

រោគផ្តាច់សង្ខារចោលម៉ែឳ

។

ម៉ែឳចិញ្ចឹមដប់ម្ភៃឆ្នាំ

កូនបានធ្វើកម្មកេរ្តិ៍អាស្រូវ

ចុះចេញពីផ្ទះបាត់ភ្លាមទៅ

តើឲ្យម៉ែឳនៅសល់អ្វី

?

ប៉ុត សាវង្ស

ទឹកភ្នែកម្តាយស្រស់ព្រោះកូនស្រី

កូនតាមសម័យភ្លេចពិចារណ៍

ធ្វើឲ្យទ្រូងម្តាយសែនអួលផ្សារ

ណែនក្នុងឱរាគ្មានអ្វីផ្ទឹម

។

រាងរាល់ថ្ងៃយប់មិនសប្បាយ

ឱស្រស់ឆោមឆាយម្តាយសង្ឃឹម

ថាកូនម្តាយមានក្តីរំពឹង

តែពៅព្រលឹងម្តាយខកចិត្ត

។

ឱះឱកូនស្រីមាសម្តាយអើយ

ម្តេចឡើយព្រងើយមិនអាណិត

អាសូរូបម្តាយណាវរមិត្ត

ព្រោះម្តាយងងិតកាន់តែចាស់

៕

ដោយ លី ប៊ុនលីន

ឱ!កូនអើយអ្នកគេងទៅ

យប់ហើយមាសពៅគេងឲ្យលក់

ភ្ញាក់ពីព្រលឹមកុំទ្រមក់

លុបមុខសិតសក់ទៅរៀនសូត្រ

។

ឱ!កូនអើយស្ងួនមាសពុក

ប៉ាចង់ជួបមុខកូនរហូត

ប៉ាចង់ឃើញកូនចិត្តស្លូតបូត

កូនអើយខំស្រូតទាន់ខ្លួនក្មេង

។

ប៉ាខំស្រែកច្រៀងបំពេរអ្នក

ព្រោះប៉ាជឿជាក់មិនវង្វេង

ខ្លានកូនលុងឈ្លក់ដើរផ្លូវផ្សេង

ប៉ាសែនចំបែងរែងខ្វាយខ្វល់

។

ប៉ាឃ្លាតតែកាយមិនឆ្ងាយចិត្ត

ប៉ានៅនឹកគិតសែនកង្វល់

កូនអើយខំទៅពៅកុំឆ្ងល់

រូបប៉ានៅសល់តែបណ្តាំ

។

កូនអើយគេងទៅសុបិនល្អ

តាំងចិត្តស្មោះសជាប្រចាំ

ស្អែកនេះថ្ងៃថ្មីយើងផុតកម្ម

កូនត្រូវតែទ្រាំខំសិក្សា

។

កូនអើយខំថែកេរ្តិ៍ម៉ែឳ

ខែរះឆ្លងផ្លូវសម្លាញ់ប៉ា

កូនកើតមុនឳពរលោកតា

ទៅណាមកណាកុំភ្លេចខ្លួន

។

សូមកូនដើរដោយតាមគន្លង

ចូរខំគិតគ្រងណាមាសស្ងួន

ពុកសែនលំបាកទុក្ខផ្ទួនៗ

ព្រោះខ្លាចមាសស្ងួនភ្លេចកំណើត

។

តែងដោយ ណុប ច័ន្ទតារា

ហៃអស់យុវជននិងនារី

ខ្មែរគ្រប់ទិសទីខំរក្សា

ដំណែលកេរ្តិ៍កោះពីដូនតា

វប្បធម៌ថ្លៃថ្លារក្សាទុក

។

ពុះពារតស៊ូខំរៀនសូត្រ

តាំងចិត្តស្លូតបូតជាទំនុក

ចៀសវាងអំពើអបាយមុខ

ទើបខ្មែរបានសុខគ្រប់ទិសទី

។

សរសរទ្រូងជាតិបានរឹងមាំ

ក្មួយជួយថែទាំនាំគ្នាគ្នី

ក្រេបយកចំណេះខំសំភី

ជ្រោយដីចាក់ជីរកើនទិន្នផល

។

ក្មួយអើយកុំគិតគំនិតខ្លី

ទាំងប្រុសទាំងស្រីកុំងឿងឆ្លល់

នគរថ្កើងយសខ្មែរលែងខ្វល់

តែក្មួយត្រូវស្គាល់ការតស៊ូ

។

ក្មួយមានចំណេះបរទេសខ្លាច

ក្មួយមានអំណាចចេះគិតគូរ

ធនធានអង្វែងប្រយោជន៍យូរ

ក្មួយត្រូវតស៊ូកុំភ្លេចខ្លួន

។

ខ្ញុំសូមជូនពរជារៀងរាប

សូមមានសុខភាពរឹងមាំមួន

សូមក្មួយក្រោកឡើងណាស្ងួន

រហ័សរហួនខំសិក្សា

។

ដោយ ណុប ច័ន្ទតារា