ឱ!កូនអើយអ្នកគេងទៅ

យប់ហើយមាសពៅគេងឲ្យលក់

  

ភ្ញាក់ពីព្រលឹមកុំទ្រមក់

លុបមុខសិតសក់ទៅរៀនសូត្រ

។

ឱ!កូនអើយស្ងួនមាសពុក

ប៉ាចង់ជួបមុខកូនរហូត

  

ប៉ាចង់ឃើញកូនចិត្តស្លូតបូត

កូនអើយខំស្រូតទាន់ខ្លួនក្មេង

។

ប៉ាខំស្រែកច្រៀងបំពេរអ្នក

ព្រោះប៉ាជឿជាក់មិនវង្វេង

  

ខ្លានកូនលុងឈ្លក់ដើរផ្លូវផ្សេង

ប៉ាសែនចំបែងរែងខ្វាយខ្វល់

។

ប៉ាឃ្លាតតែកាយមិនឆ្ងាយចិត្ត

ប៉ានៅនឹកគិតសែនកង្វល់

  

កូនអើយខំទៅពៅកុំឆ្ងល់

រូបប៉ានៅសល់តែបណ្តាំ

។

កូនអើយគេងទៅសុបិនល្អ

តាំងចិត្តស្មោះសជាប្រចាំ

  

ស្អែកនេះថ្ងៃថ្មីយើងផុតកម្ម

កូនត្រូវតែទ្រាំខំសិក្សា

។

កូនអើយខំថែកេរ្តិ៍ម៉ែឳ

ខែរះឆ្លងផ្លូវសម្លាញ់ប៉ា

  

កូនកើតមុនឳពរលោកតា

ទៅណាមកណាកុំភ្លេចខ្លួន

។

សូមកូនដើរដោយតាមគន្លង

ចូរខំគិតគ្រងណាមាសស្ងួន

  

ពុកសែនលំបាកទុក្ខផ្ទួនៗ

ព្រោះខ្លាចមាសស្ងួនភ្លេចកំណើត

។

តែងដោយ ណុប ច័ន្ទតារា