Poem Cambodia Angkorwat ..Khmerangkorwat..

សូមស្វាគមន៍ បងប្រុស បងស្រី ជាទីស្រលាញ់ អរគុណណាស់ដែលបានចូលមកមើលប្លករបស់ខ្ញុំ...ហើយប្រសិនបើបងប្រុសបងស្រីចង់ទាក់ទងខ្ញុំសូមអញ្ជើញផ្ញើអ៊ីម៉ែលមកខ្ញុំ.....

កំណាព្យMay 5, 2008 3:58 pm

គំនុំស្ត្រីខ្មែរ

ថ្ងៃរះក្តៅហែង	ងងិតម្នាក់ឯង	កណ្តាលវាលធំ
សំបកក្រៅសើច	ឈាមក្នុងស្រែកយំ	កណ្តាលវាលធំ
	យំក្នុងសើចក្រៅ ។
មួយនឹកដល់ប្តី	ដែលចោរអប្រីយ៍	ខាងជើងចាប់ទៅ
មួយនឹកដល់កូន	មាសស្ងួនឆោមឆ្អៅ	ខាងត្បូងលួចទៅ
	យូរខែឆ្នាំហើយ ។
ឱ!សែនសង្វេគ	ប្តីកូនកែវភ្នែក	សម្លាញ់ខ្ញុំអើយ
តើព្រាត់ជួបវិញ	ឫមិនជួបឡើយ	ខ្មែរទុក្ខឥតស្បើយ
	ទុក្ខអើយទុក្ខងំ ។
ថ្ងៃរះក្រៅហែង	ងងិតម្នាក់ឯង	កណ្តាលវាលធំ
សំបកក្រៅសើច	បេះដូងទួញយំ	ខ្មែរបៀមគំនុំ
	យំក្នុងសើចក្រៅ ៕
ដកស្រង់ចេញពីអង្គការជានរណា?

កំណាព្យ 1:56 pm

លាបងប្អូនមួយរយៈ

ខ្ញុំកាន់តែចាស់ចំណាស់ខ្លាំង	ភ្នែកក៏ស្រវាំងដៃខ្ញុំស្ពឹក
សរសេរចុងចួនក្បួនរកនឹក	ជួនកាលភ្លេចភ្លឹកនឹកលែងចេញ	។
តែសូមសច្ចាសន្យាចិត្ត	កំដរញាតិមិត្តគ្មានទោរម្នេញ
បើមុននឹងស្លាប់នៅទន្ទេញ	ខ្មែរអើយវិលវិញរួបរួមគ្នា	។
ខ្ញុំស្រឡាញ់ខ្មែរដក់ក្នុងចិត្ត	មានតែគំនិតគ្រប់វេលា
ដូច្នេះសូមខ្មែរកុំចងពៀរ	នាំមានវេរាទៅជាតិមុខ	។
សូមលាបងប្អូនមួយកាលៈ	តែចិត្តជំពាក់រឿងក្នុងស្រុក
លាហើយបងប្អូនសូមបានសុខ	ថ្ងៃនេះទៅមុខខ្មែររួមគ្នា	។
ខ្ញុំសូមសន្យាកើតជាខ្មែរ	តាមរក្សាថែពង្សកម្ពុជា
ជាតិនេះខ្ញុំរស់សែនរងា	តែខ្ញុំសូមលាគ្នាសិនហើយ	។
ខ្ញុំស្រក់ទឹកភ្នែកឯងឯកា	តើមាននរណាគេចាំឆ្លើយ
ខ្ញុំឈឺម្នាក់ឯងគ្មានកោះត្រើយ	រង់ចាំចម្លើយខ្មែរសាមគ្គី	។
ខ្មែរអើយឈប់ឈ្លោះជម្លោះទៅ	នាំក្តីអាស្រូវគ្រប់ទិសទី
ខ្ញុំខ្មែរឆ្អែតចិត្តនៅវក់វី	ខ្មែរត្រូវសាមគ្គីទើបយើងរស់	។
អំណាចកោងកាចប្រាជ្ញនិងព្រោក	ផ្លូវធម៌ផ្លូវលោកគ្មានអនុគ្រោះ
ខ្ញុំសូមលាអ្នកដោយក្តីស្មោះ	លាសាងជាឈ្មោះនាមជាខ្មែរ	។
ស្តាយណាស់ជាតិនេះយើងបែកគ្នា	ខ្ញុំរស់កំព្រាចិត្តនៅស្នេហ៍
លាមាតុភូមិចំការស្រែ	លាកេរពុកម៉ែទាំងទឹកភ្នែក	៕
ដោយ ណុប ច័ន្ទតារា

កំណាព្យ 1:09 pm

ដោយ ណុប ច័ន្ទតារា
ខ្ញុំសូមអរគុណមិត្តអ្នកអាន	ដែលតែងតាមដានអានពត៍មាន
កំណាព្យកាព្យឃ្លោងខ្មែររស់រាន	គិតគួរបង្រៀនដល់រូបខ្ញុំ	។
បានផ្ញើសំបុត្រសួរសុខទុក្ខ	ពីគ្រប់ភូមិស្រុកច្រើនកុះកុំ
ទទួលលិខិតប្រមូលផ្តុំ	បញ្ជាក់ថាខ្ញុំគ្មានអ្វីទេ	។
សុខភាពរឹងមាំដូចធម្មតា	តែមិនសន្យារូបយើងគេ
កើតហើយនិងស្លាប់ដែទទេ	រូបយើងរូបគេដូចតែគ្នា	។
ខ្ញុំស្ពឹកចំហៀងផ្នែកខាងឆ្វេង	ជួនកាលវង្វេងពាក្យឃ្លោងឃ្លា
រ៉ីកុំព្យូទ័រទាំងឈឺជា	ព្រោះមានវេរាកើតជាខ្មែរ	។
អរគុណមាគ៌ាជាប្អូនស្រី	ប្អូនកុំគិតអ្វីយើងនៅតែ
ជាតិនិងជរាតាមមកក្បែរ	ព្យាធិតាមស្នេហ៍និងមរណៈ	។
ជាប្រុសដូចបងដូចជានក	មិនដែលលង់លក់ឲ្យលិចធ្លាក់
បើមុននិងស្លាប់ត្រូវជឿជាក់	មនុស្សយើងម្នាក់ៗត្រូវតស៊ូ	៕

កំណាព្យ 12:57 pm

ធាតុបួន

ដោយ ណុប ច័ន្ទតារា
ជីវិតសត្វលោកកើតក្នុងភព	មានថ្ងៃមានយប់មានភ្លៀងផ្គរ
ធម្មជាតិធាតុបួនជាទម្រ	ដែលជួយគាំទ្រដល់ជីវិត	។
ធាតុដីធាតុទឹកធាតុភ្លើងខ្យល់	ថែទាំតំកល់ផ្តល់ជាមិត្ត
សព្វសត្វក្នុងលោកមានពិតៗ	ល្អស្រស់ប្រណីតពឹងលើធាតុ	។
យើងត្រូវការធាតុទាំងបួននេះ	កំណើតកើតចេះនៅក្នុងជាតិ
ទឹកដីភ្លើងខ្យល់មិនគ្រោតគ្រាត	ទ្រទ្រង់ធម្មជាតិនិងសត្វលោក	។
អ្វីៗទាំងអស់នៅក្នុងខ្លួន	ផ្សំនូវធាតុបួនជាសំយោគ
រូបមន្តជីវិតមានជ័យជោគ	រស់នៅក្នុងលោកភពផែនដី	។
លុះពេលជីវិតត្រូវបាត់បង់	ខ័ន្ធប្រាំចាកអង្គហៅថាក្ស័យ
រូបកាយរលាយក្លាយជាដី	ភ្លើងខ្យល់គ្មានអ្វីបន្សល់ឡើយ	។
បំណែកខ្លះទៀតក្លាយជាទឹក	មនុស្សគួរគិតនឹកទុកឲ្យហើយ
ពេលមានជីវិតកុំកន្តើយ	ឱ!ធម្មទាយអើយគួរគន់គិត	៕

កំណាព្យ 5:00 am

ធ្វើម្តេចបងគ្មានដុល្លា

សាយ័ណ្ណទោចយំជើងភ្នំវត្តស្រែ	ទុក្ខខ្ញុំឥតល្ហែព្រោះស្នេហ៍ឃ្លាតឆ្ងាយ
ក៏ព្រោះតែស្នេហ៍ផ្តាច់ចិត្តផ្តាច់កាយ	ឲ្យខ្ញុំឃ្លាតឆ្ងាយឆ្ងាយពីរូបស្រី	។
ថ្ងៃអូនរៀបការថ្ងៃប្រុសបងយំ	ភ្លេងការប្រគំបងយំនឹកស្រី
ថ្ងៃអូនញញឹមសាងជីវិតថ្មី	ថ្ងៃបងលាស្រីទាំងក្តីស្រណោះ	។
ឱទឹកភ្នែកអើយឈប់ហូតទៀតទៅ	ក្តីស្នេហ៍អាស្រូវទុក្ខនៅនិងប្រុស
អូនការគូថ្មីគាប់ម្តាយស្រីចុះ	បងឱបក្តីស្មោះយំសោកខ្លោចផ្សារ	។
ធ្វើម្តេចជាតិនេះបងគ្មាននិស្ស័យ	បានត្រឹមស្គាល់ស្រីក្នុងនាមសង្សារ
រូបបងក្រទ្រព្យម្តាយស្រីផ្តាច់ការ	ឃើញប្រាក់ដុល្លាប្រហារចិត្តស្មោះ	។

“Previous”“Next”

រៀបចំធ្វើនិងរក្សាសិទ្ធិដោយ លី ប៊ុនលីន អាចទាក់ទងបានតាមអ៊ីម៉ែល MSN YAHOO GMAIL
Copyright by Ly Bunlin. You could contact me by my Email. ធ្វើពុធ អង្គារ ទី ១៨ ខែមីថុនា ឆ្នាំ២០០៨

Categories:

Search

Archives: